t Evengelie volgens Matteüs 27
01Smörgensvroug besloten ale hogepriesters en oldsten van t volk om Jezus om te brengen.
02Zai sluigen hom in boeien, brochten hom vot en leverden hom oet aan stadholder Pilatus.
03Dou Judas, dij hom overleverd haar, zag dat e veroordaild was, muitte hom dat. Hai brochde de datteg zulverstokken noar hogepriesters en oldsten weerom.
04"Ik heb ter verkeerd aan doan," zee e. "k Heb n onschuldeg man verroaden!" "Wat kin ons dat schelen!" was heur antwoord. "Doar mostoe zulm mor mit kloar kommen!"
05Dou smeet e zulverstokken in tempel, muik dat e votkwam en hong zok op.
06Hogepriesters pakten t geld en zeden: "Wie maggen t nait maank ovvergoave doun. t Is ja bloudgeld!"
07Ze besloten der poddebakker zien laand veur te kopen om der boetenlanders op te begroaven.
08Doarom hait dat stok laand tot vandoag aan tou Bloudakker.
09Zo is profeet Jeremia zien woord woar worden: "Ze pakten dij datteg zulverstokken - pries doar Isrelieten hom op schat haren -
10 en ze gavven dat geld veur poddebakker zien laand. Zo haar de Heer mie t besteld."
11 Zo wer Jezus veur stadholder hènzet. Dij vruig hom: "Bin ie keunenk van Jeuden?" "Zo as ie zeggen!" zee Jezus.
12 En dou e beschuldegd wer deur hogepriesters en oldsten, zee Jezus niks weerom.
13 "Heur ie nait wat ze altmoal tegen joe inbrengen?" vruig Pilatus.
14 Mor Jezus antwoordde hom der mit gain woord op. Dat dee stadholder slim nij.
15 Nou was t gebruuk dat stadholder bie elk feest ain gevangene vrij luit. t Volk mog zeggen wèl.
16 Der zat dou n beruchte kerel vaast. Hai haitte Barabbas.
17 Zai wazzen nou toch altmoal bie nkander dat zodounde zee Pilatus tegen heur: "Wat wil ie? Wèl mout ik vrij loaten? Dij Barabbas of dij Jezus, doar ze Christus tegen zeggen?"
18 Hai wos ja wel dat ze hom oet ofgunst overleverd haren.
19 Dou Pilatus op zien rechtstoul zat, stuurde zien vraauw hom n bosschop: "Bemui die nait mit dizze rechtveerdege! k Heb vannaacht haile maal over hom dreumd."
20 Mor hogepriesters en oldsten haren ondertied t volk beproat: ze zollen Barabbas kaizen en Jezus doodmoaken loaten.
21 "Wèl van dij twij wil ie nou hebben?" vruig Pilatus heur. "Barabbas!" zeden ze.
22 Pilatus weer: "Mor wat mout ik den doun mit Jezus, doar ze Christus tegen zeggen?" "Aan t kruus mit hom!" raipen ze as ain man.
23 "Mor woarom? Wat het e den veur verkeerds doan?" Mor zai bèlkten aal haarder: "Aan t kruus mit hom!"
24 Pilatus vernam wel dat e zo gain stap wieder kwam; rebulie wer allenneg mor groder. Doarom luit e zok n koem mit wotter brengen en wosk zok handen dat elk t zag. Dou zee e: "Ik hol mien handen schoon van dij man zien bloud! Ie mouten zulm mor zain wat of ter van komt!"
25 Mor aal t volk raip: "Loat zien bloud mor op ons kop deelkommen en op ons kinder heurent!"
26 Dou dee Pilatus t volk zien zin: Barabbas luit e vrij, mor Jezus luit e giezeln. Doarnoa leverde hai hom over, den konden ze hom aan t kruus sloagen.
27 Dou nammen stadholder zien soldoaten hom mit noar t hoofdgebaauw. Haile kompie huilen ze der bie.
28 Ze ropten hom klaaier van t lief en deden hom n sangen mantel om.
29 Ze bonden n kraans van stiekeldoorns bie nkander en zetten hom dij op kop. In rechterhaand gavven ze hom n raaiten stòk. Dou gingen ze veur hom op knijen en scheerden hom gek aan: "Goidag, keunenk van Jeuden!"
30 Ze spijden hom liek in t gezicht, trokken hom stòk tou haand oet en gavven hom der wat mit op kop.
31 Dou ze hom genog veur gek holden haren, deden ze hom mantel òf, trokken hom zien aigen goud weer aan en brochten hom vot om hom aan t kruus te sloagen.
32 Even boeten stad trovven ze n man oet Cyrene. Hai haitte Simon. Dij mos t kruus droagen.
33 Zo kwammen ze op n plak, dij Golgota haitte, dat bedudt: "Doodskop".
34 Ze gavven hom wien te drinken mit gaal der deur. Dou hai t pruifd haar, wol e t nait hebben.
35 Doarnoa sluigen ze hom aan t kruus en verdobbelden zien klaaier onder nkander.
36 Zo zatten ze doar bie hom wacht te holden.
37 Boven zien kop schreven ze woarom e veroordaild was: "Dit is Jezus, Jeuden heur keunenk."
38 Tougelieks mit Jezus werden twij aander manlu aan t kruus sloagen: ain aan zien rechter- en ain aan zien linkerkaant. t Wazzen rovers.
39 Lu dij verbie gingen, sliepten hom oet en schudden mit kop.
40 "Hé doe!" raipen ze. "Doe, dij tempel ofbrekst en in drij doagen weer opbaauwst! Help die zulm nou astoe God zien Zeun bist! Kom nou van t kruus òf!"
41 Hogepriesters, schriftgeleerden en oldsten van t volk deden net zo:
42 "Aander lu het e hulpen, mor zokzulm helpen kin e nait! As e keunenk van Israël is, loat e den van t kruus òf kommen. Den zel we in hom leuven!
43 Hai vertraauwt op God: loat dij hom nou helpen as dij hom toudoan is! Hai het ja zegd dat e God zien Zeun is!"
44 Baaide rovers dij mit hom aan t kruus sloagen wazzen, scholden hom krekt zo oet.
45 Dou wer t van t zèsde uur òf duuster over t haile laand, aan t negende uur tou.
46 Om en bie drij uur raip Jezus mit geweld: "Eli, Eli, lama sabachtani?" Dat bedudt: "Mien God, mien God, woarom heb ie mie zo allain loaten?"
47 Gounent van lu dij der omtou stonden, heurden dat en zeden: "Hai ropt om Elia!"
48 Votdoalek ging ain aan run, pakte n spons, deupte dij in zoere wien, stook hom op punt van n stòk en perbaaierde hom drinken te geven.
49 Mor aander lu zeden: "Ho es even! Nou kin we mooi zain of Elia komt om hom te helpen!"
50 Vannijs raip Jezus haile haard en gaf de gaist.
51 Op t aigenste ogenblik scheurde gedien in tempel middendeur, van boven noar ondern. Grond schudde en rotsen broken oetnkander.
52 Groaven gingen open en liggoamen van n bult haailege mensken dij al laank dood wazzen, werden opwekt.
53 Zai kwammen tou heur groaven oet en gingen dou Jezus opstoan was, noar haailege stad tou. Doar hebben hail wat lu heur zain.
54 Dou kaptaain en zien soldoaten dij bie Jezus wacht holden haren, eerdbeven en ales wat ter nog meer gebeurde, zagen, werden ze der kèl van. "Eerlieks woar!" zeden ze, "dij man was God zien Zeun!"
55 Op n ofstandje stonden veul vraauwlu te kieken. Dij wazzen oet Galilea achter Jezus aan kommen en haren veur hom zörgd.
56 Maank heur was Maria oet Magdala, Maria moeke van Jakobus en Josef, en moeke van Zebedeüs' jonges.
57 Om oavend kwam n riek man oet Arimatea. Josef was de noam. Hai heurde ook bie Jezus zien leerlingen.
58 Dij ging noar Pilatus tou en vruig hom om Jezus zien liggoam. Pilatus gaf odders dat ze hom dij geven zollen.
59 Jozef huil t liggoam van t kruus òf en wikkelde dij in schoon linnen
60 en legde dij in zien aigen grafkoamer. Dij haar e kòrtsleden in rotsen oethaauwen loaten. Hai rolde n grode stain veur ingang en ging vot.
61 Maria oet Magdala en dij aander Maria wazzen der bie. Ze zatten tegen t graf over.
62 Aanderdoagsmörgens - t was doags noa veurberaaidensdag van Pesach - gingen hogepriesters en Farizeeërs mitnkander noar Pilatus tou.
63 "Meneer," zeden ze, "t is ons in t zin schoten dat dij bedraiger dou e nog leefde, zegd het: 'Noa drij doag zel ik weer tou t levent opwekt worden!'
64 Kin ie gain odders geven n wacht bie t graf te zetten aan dij daarde dag tou? Aans kinnen zien leerlingen kommen en hom vothoalen. En den vertellen ze mensken: ' Hai is opwekt tou dood oet!' Den zol dij leste bedraigerij nog slimmer wezen as eerste!"
65 "Hier heb ie n wacht!" zee Pilatus tegen heur. "Moak de haile bröd mor zo vaaileg as ie kinnen!"
66 Zai gingen noar t graf tou, sloten dij òf en verzegelden stain. n Wacht zetten ze der bie om t graf te bewoaken.
|
